После успешната реализација и солидна посетеност на претходните пет изданија на Омнибустопија, овогодинешното издание на овој интердисциплинарен и мултиуметнички фестивал не ја доби очекуваната поддршка. Недостатокот на финансиска поддршка го доведува во прашање опстанокот на независната културна сцена и авангардните уметнички форми промовирани на фестивалите од овој тип.
Во таа насока, организаторите на настанот од Здружението на граѓани АКСИОМА – Асоцијација за културна соработка и истражување од Скопје, побараа помош од сите љубители на авангардните уметности и на незивисната културна сцена.
Сите оние кои сакаат да го поддржат одржувањето на Омнибустопија 6, на располагање имаат три можности:
- Да донираат со посета на следниот ЛИНК;
- Да го споделат линкот за донирање со своите пријатели; и
- Да го посетат фестивалот Омнибустопија 6, кој ќе се одржи од 3 до 6 ноември 2024 година во Скопје.
Средствата собрани на оваа донаторска сметка ќе се употребат за подмирување на дел од трошоците потребни за организирање на фестивалот, кој ќе вклучува 5 концерти, работилница, промоција на монографија, изложба и разговор. Сумата од 60.000 денари е предвидена да покрие дел од хонорарите на соработниците, меѓу кои музичари, уметници и тон мајстор; како и трошоци за озвучување, осветлување, логистика, итн.
Годинешната програма на Омнибустопија 6 е своевидна рекапитулација на активностите на Аксиома во последните 12 месеци, но и антиципација на она што ќе следува во догледна иднина. Тоа значи дека музиката, повеќе од кое било претходно издание на Омнибустопија, ќе биде во преден план. Ќе имате можност да проследите несекојдневни концерти, изложба, разговори и работилница.
Целосната програма можете да ја разгледате на следниот ЛИНК.
