Повеќе од 1.200 мали и средни претпријатија од шесте држави од регионот на Западен Балкан (Албанија, Босна и Херцеговина, Косово, Србија, Северна Македонија и Црна Гора) во следните три години ќе можат да добијат конкретна поддршка од Коморскиот инвестициски форум (КИФ) за унапредување на нивните производни и извозни капацитети, за зголемување на нивното присуство на регионалните и на светските пазари, како и за зголемување на нивната подготвеност да станат добавувачи на големите мултинационални корпорации, да добијат средства од европските фондови и да привлечат странски инвестиции.
Стопанската комора на Македонија соопшти дека партнерството на тригодишниот проект за подигнување на конкурентноста на стопанството од регионот, кој ќе го имплементира Коморскиот инвестициски форум, а за којшто ЕУ издвои 2,5 милиони евра, ќе биде официјализирано денеска, во рамките на Бизнис Форумот на Самитот за Западен Балкан во Познањ, од страна на европскиот комесар за проширување и соседска политика, Јоханес Хан и претседателот на Коморскиот инвестициски форум, Марко Чадеж.
Потпишувањето на договорот е планирано за септември, почетокот на реализацијата на проектните активности во октомври, а првите услуги од заедничката регионална стопанска соработка, за стопанствениците ќе бидат достапни до крајот на годината.
– Европската унија преку овој проект помага за зајакнување на капацитетите на Коморскиот инвестициски форум и на коморите основачи на КИФ за поддршка на стопанството, но главните корисници на овие средства, односно на услугите од овој проект ќе бидат самите стопанственици, изјави Бранко Азески, претседател на Стопанската комора на Македонија и заменик-претседател на КИФ.
Во рамките на овој проект, околу 200 компании од регионот ќе можат да се поврзат и да договорат билатерална соработка на деловните средби организирани од КИФ, повеќе од 60 компании ќе добијат поддршка да влезат во меѓународните синџири за добавување, а исто толку компании заеднички ќе настапат на три големи меѓународни саеми. Планирани се и три големи инвестициски конференции за промоција на регионот и на успешните бизнис приказни од регионот пред странските инвеститори. Дополнително, околу 20 компании ќе можат да добијат техничка помош во подготовката на проектите при аплицирањето за средства од програмите и фондовите на ЕУ, како што се „Хоризонт 2020“, „КОСМЕ“ или „Креативна Европа“.
Азески, како што се наведува во соопштението, информира дека на стопанствениците ќе им се стават на располагање „онлајн“ бази на податоци со квалитетни информации за одделни странски пазари, како и специјално креирани информации за нивните потреби, а ќе се организираат и инфо-денови, семинари и работилници на кои стопанствениците ќе се едуцираат за придобивките кои ги носи регионалната економска област и ќе добијат совети како да ја зајакнат меѓусебната регионална соработка и да го интернационализираат своето работење.
Посебно внимание ќе биде посветено на унапредувањето на комуникацијата помеѓу јавниот и приватниот сектор во регионот, но и со Европската унија, во насока на унапредување на процесот на воспоставување на регионалната економска област. Планирано е одржување на три бизнис платформи помеѓу бизнисот од регионот и носителите на одлуки во ЕУ, со учество на повеќе од 300 стопанственици од регионот. Ќе бидат подготвени и 9 студии и анализи, со кои ќе се идентификуваат препреките за деловна соработка во регионот, со препораки до надлежните органи за нивно отстранување.
-Конкретната поддршка за компаниите ќе донесе и конкретни придобивки и за економиите на државите од Западен Балкан во целина, вели Азески.
Целта, како што посочува, е за време на проектот, компаниите од регионот меѓусебно, но и со компании од трети пазари, да потпишат договори вредни околу 50 милиони евра.
-Истовремено, анализите укажуваат дека овој проект ќе придонесе до 2022 година БДП по глава на жител во регионот да порасне од сегашното ниво од една третина на просекот на ЕУ, до 40% од просекот во Унијата. Увозот и извозот на стоки и услуги да пораснат на 57%, односно на 70% од регионалниот БДП, а меѓусебната размена во рамките на регионот да порасне од постојните 4,5 милијарди на 6,6 милијарди евра, рече Азески.
Коморите основачи на КИФ, помеѓу кои е и Стопанската комора на Македонија, на Самитот на Западен Балкан ќе го претстават стопанството од регионот на заеднички штанд на КИФ. По потпишувањето на писмото за намери за реализација на проектот за поконкурентен регион и обраќањата на Јоханес Хан и Марко Чадеж, ќе се одржи панелот: „Регионална економска област – што очекува бизнисот?“, на којшто претставниците од коморите и ЦЕФТА -Секретаријатот ќе говорат за досегашниот напредок, препораките на бизнисот и заедничките активности за отстранување на препреките за прекугранична размена во регионот на Западен Балкан, се посочува во соопштението од Стопанската комора на Македонија.
МИА
