Универзумот на Nintendo официјално ќе се најде на големиот екран откако јапонскиот гигант за видео игри соопшти дека ја купува компанијата за визуелна продукција Dynamo Pictures од Токио, со цел да произведува „визуелни содржини користејќи ја интелектуалната сопственост на Nintendo“.
Штом купопродажниот договор биде финализиран, што најверојатно ќе се случи во октомври, студиото за анимација ќе биде преименувано во Nintendo Pictures. Преку оваа аквизиција, производителот на Super Mario и други популарни франшизи на видео игри има намера да ја „зајакне структурата на планирање и производство на визуелни содржини во рамки на групцијата Nintendo“.
Продукциската куќа Dynamo Pictures, која работи веќе 11 години, може да се пофали со богато портфолио на проекти за компјутерска анимација, вклучително и сет кратки анимирани спотови за Nintendo базирани на серијалот игри Pikmin.
Nintendo не ги елаборираше видовите на „визуелни содржини“ што се надева да ги развива со своето ново студио, но неодамнешното вклучување на гејминг индустријата во продукцијата на филмови и телевизиски серии може да понуди некои индиции.
Различните креатори на видео игри веќе имаат објавувано филмски адаптации на нивните франшизи како Arcane, Resident Evil, Mortal Kombat, Monster Hunter, Sonic the Hedgehog, Detective Pikachu и The Angry Birds Movie. На пат се и нови адаптации на Call of Duty, Mass Effect и The Last of Us. Во 2023 година, исто така, се очекува филм инспиран од Super Mario Bros, чиј главни ѕвезди ќе бидат актерите Крис Прат, Сет Роган и Ана Тејлор-Џој.
Филмската адаптација на видео игри не е ништо ново, но од Nintendo се подготвени да ја преземат водечката улога бидејќи другите гиганти во индустријата за видео игри не ги произведуваат тавквите филмови и телевизиски серии самостојно, во рамки на сопствената групација, туку преку партнерства со надворешни продукциски куќи.
