Вчера започна годишното издание на Светската конференција на девелопери (WWDC), организирана од страна на технолошкиот гигант Apple, која се одржува во Купертино, Калифорнија, а ќе трае до овој петок.
Големото соопштение на компанијата на првиот ден од конференцијата беше Apple Intelligence – надградба на системот дизајнирана да ја интегрира генеративната вештачка интелигенција во низа апликации и услуги на Apple.
Имено, на настанот беа претставени повеќе нови функции за генерирање текст и слики. Новата функција во Notes, на пример, ќе им овозможи на корисниците да снимаат и транскрибираат аудио, а потоа брзо да создаваат резимеа користејќи генеративна вештачка интелигенција. Друга нова функција наречена Genmoji ќе им овозможи да креираат сопствени емотикони врз основа на едноставен текстуален опис. Корисниците исто така ќе можат да генерираат илустрации на пријатели или членови на семејството за да додадат персонализиран момент во текстуалните разговори.
Нова и подобрена верзија на гласовниот асистент Siri ќе може поефективно да ги разбира и да комуницира со корисниците преку природен јазик. Компанијата објави дека склучила договор со OpenAI за да го интегрира ChatGPT во својот гласовен асистент. Со интеграцијата во Siri, корисниците ќе имаат можност да го користат четботот за прашања кои бараат подолги и подетални одговори.
Apple ќе започне со имплементација на Apple Intelligence во бета верзија веќе оваа есен, а интеграцијата на ChatGPT ќе започне подоцна оваа година.
