На денот кога американскиот претседател Доналд Трамп ги претстави опсежните тарифи кои ја потресоа глобалната трговија, американскиот производител на автомобили Ford ја претстави својата нова кампања и промотивна понуда за американските потрошувачи.
Под насловот “From America, For America” („Од Америка, за Америка“), новата понуда на Ford подразбира дека сите американски граѓани ќе добиваат еднаков попуст во купувањето на нови возила како и самите вработени во компанијата.
Централниот телевизиски спот на кампањата го раскажува актерот и бренд-амбасадор Брајан Кренстон (најпознат по улогата на Волтеј Вајт во Breaking Bad), кој опишува оваа понуда како „невиден момент во автомобилската историја“ и потоа го објаснува обемот на деловните операции на компанијата во САД и бројот на Американци што таа ги вработува.
Според тарифите на Трамп, увозот на автомобили и автомобилски делови во САД ќе биде царинет со 25%, што претставува голем удар како за странските производители на автомобили, така и за американските компании кои произведуваат во други држави. Се чини дека Ford ќе биде релативно отпорен на овие тарифи, со оглед на фактот што 80% од нивното производство наменето за американскиот пазар се случува токму во американски фабрики.
Компанијата ќе се обиде да ја искористи кампањата за да ги надмине можните зголемувања на цените со кои неминовно ќе се соочат американските потрошувачи.
„Разбираме дека ова се несигурни времиња за многу Американци. Без разлика дали се работи за навигација во сложеноста на променливата економија или едноставно ви треба сигурно возило за вашето семејство, сакаме да помогнеме. Оваа програма е доказ за нашата посветеност да составуваме автомобили онаму каде што ги продаваме. Тоа е начин за нас да им возвратиме на заедниците што нè поддржуваат со генерации. Ford е горд што вработува повеќе американски работници од кој било друг производител на автомобили. Кога купувате возило од Ford, не само што добивате способно возило, вие инвестирате во американските возила и американските заедници. Ние веруваме во генијалноста и истрајниот дух на американскиот возач“ – истакнува Роб Кејфл, директор на Ford за продажба и деловни односи во САД.
Кампањата се реализира во соработка со креативната агенција Wieden+Kennedy.
