Иднината на DDB, едно од најпрестижните имиња во светот на огласувањето, е доведеја во прашање откако матичната компанија Omnicom Group започна сеопфатна ревизија на сите свои агенциски брендови. Според извори од индустријата, групацијата најверојатно ќе го намали глобалното присуство на мрежата DDB, која моментално брои повеќе од 90 канцеларии во над 40 земји, иако се очекува брендот да продолжи да делува на одбрани пазари каде што одговара на потребите на клиентите.
Гласините за судбината на DDB се засилија откако еден латиноамерикански медиум објави дека Omnicom планира да ја распушти мрежата по комплетирањето на најавеното спојување со Interpublic Group. Компанијата, сепак, не ја потврди оваа информација, изјавувајќи дека спроведува „строг и внимателен процес“ со цел да ја утврди најсоодветната структура за своето идно работење. Од Omnicom додаваат дека сè уште функционираат како две независни компании сè додека не биде завршена регулаторната постапка за спојувањето.
Мрежата на DDB вклучува добро познати подбрендови како Adam & Eve/DDB, која неодамна освои значајни клиенти, меѓу кои и Porsche, како и Alma DDB, мултикултурна агенција со седиште во Мајами. Се смета дека овие агенции би можеле да продолжат да постојат во одредена форма, дури и доколку дојде до намалување на пошироката DDB мрежа.
Можното преструктуирање доаѓа во момент кога Omnicom го очекува финалното одобрение од Европската унија за завршување на спојувањето со Interpublic Group – чекор што би ја создала најгомата маркетиншка групација во светот. Пазарните шпекулации укажуваат дека проширената компанија би можела да се фокусира на три главни креативни мрежи: BBDO, McCann и TBWA, задржувајќи ги помалите брендови во одредени локални пазари.
Основана во 1949 година од Бил Бернбах, Џејмс Едвин Дојл и Максвел Дејн, агенцијата DDB го постави темелот на современото огласување и во поновото минато беше прогласувана за „Агенциска мрежа на годината“ на фестивалот Cannes Lions. Под водството на Алекс Лубар, глобалениот извршен директор назначен во 2023 година, DDB продолжува да создава наградувани кампањи, но нејзината иднина во рамките на новата структура на Omnicom сè уште останува неизвесна.
