Пишува: Емилија Гроздановска – креативен професионалец со двојна улога како маркетинг специјалист и графички дизајнер, комбинирајќи стратешко размислување со визуелна уметност за создавање на ефикасни и привлечни кампањи.
Во последниве години, како маркетинг специјалист, сè почесто забележувам како очекувањата на потрошувачите постојано растат. Денес, повеќе од кога било, корисниците не бараат само квалитетни производи или услуги – тие очекуваат целокупното искуство со брендот да биде едноставно, непречено и пријатно. Овие очекувања ги поставуваат големите брендови кои перфектно ги интегрираат своите комуникациски канали. Од ова искуство го научив значењето на омниканалниот маркетинг како концепт кој создава интегрирано искуство за клиентите.
Што е омниканален маркетинг?
Најпрво сакам да објаснам во една наједноставна форма што е омниканален маркетинг и да го споделам искуството од моето секојдневно работење.
Омниканалниот маркетинг го разбирам како стратегија која ги обединува сите канали што ги користиме – од нашите физички локации, па сè до дигиталните платформи. Најважно е што сè функционира синхронизирано, така што без разлика од каде клиентот ќе започне – веб-страница, социјални мрежи, или физичка филијала – тој ќе добие исто чувство за брендот.
На пример, ако имаме ситуација со клиент кој пребарува на нашата веб-страница, потоа прати порака преку Facebook, и на крајот дојде во филијала/канцеларија за одредена информација, е многу битно да постои добра интеграција на податоците, а ако овие канали би функционирале како одделни светови и клиентот во три наврати добива различен одговор, корисничкото крајно искуство е збунувачко и не го постигнува посаканиот квалитет.
Клучните предности на омниканалниот пристап
Во мојата пракса, три придобивки на омниканалниот маркетинг се покажале како најклучни:
- Подобро корисничко искуство
Сите клиенти сакаат да се чувствуваат разбрано. Кога каналите се поврзани, тие забележуваат дека брендот се грижи за нив. Ова значително ја намалува фрустрацијата на клиентите.
- Поголема лојалност
Приметив дека кога клиентите имаат позитивно и непречено искуство, тие се враќаат кај нас. Ова не е само затоа што производот е добар, туку затоа што довербата во брендот се зголемува.
- Подобрена анализа на податоци
Благодарение на технологијата, имам јасен увид во навиките и потребите на клиентите. Ова не само што ми помага да го подобрам маркетингот, туку и да создавам подобри стратегии за продажба.
Како да го примените овој пристап?
Од сопствено искуство, еве неколку совети за успешно имплементирање на омниканална стратегија:
- Запознајте ја вашата публика
Прва и основна алатка која ја форсирам во секоја стратегија што ја развивам, е анализа на купувачот односно публиката, без разлика дали е дизајн или маркетинг стратегија битно ми е да знам кој е нашиот клиент. Анализата на податоци е клучна за да ги разбереме нивните очекувања.
- Интеграција на каналите
Еден од најголемите предизвици во работењето е да ги поврземе сите платформи што ги користиме, а тој предизвик е основата која треба да се постави за да се постигне смут ефект во маркетинг работењето.
Синхронизацијата на CRM, е-трговија и алатките за социјални мрежи создаде унифициран поглед на клиентите.
- Автоматизација на процесите
Ова го олеснува управувањето со маркетингот. Со алатки за автоматизација, сега можаме да креираме конзистентни пораки кои се релевантни за секој канал.
- Континуирано тестирање и оптимизација
Секогаш, ама апсолутно секогаш мора да правите анализа на кампањите – што функционира, а што не. Ова помогна постојано да ги подобруваме стратегиите.
—
Во маркетингот, секогаш ги ставам клиентите на прво место. Омниканалниот пристап е мојот одговор на нивните очекувања за унифицирано искуство. Знам дека не е едноставно, но вреди. Клиентите го препознаваат напорот, а тоа резултира со лојалност и зголемена доверба во брендот.
Ако сакате вашиот бренд да биде релевантен во денешниот свет, ви препорачувам да размислите за омниканален пристап. Вашите клиенти го очекуваат тоа, а вие само треба да им го овозможите!
