Компанијата „Плива“ ја потврди својата посветеност кон образованието и науката со значајна донација за Фармацевтскиот факултет во Скопје. Факултетот доби два апарати за изведување хроматографија од марката Agilent HPLC 1100 (High-Pressure Liquid Chromatography – HPLC), кои ќе се користат за практична едукација на студентите и за научно-истражувачки активности.
Донацијата е распределена на две клучни локации: Институтот за фармацевтска технологија и Центарот за управување со терапија со лекови, каде студентите ќе имаат можност да стекнат знаења и вештини со примена на современи аналитички методи. Овие апарати овозможуваат високопрецизна анализа и ќе придонесат за квалитетно реализирање на наставните програми за сите три циклуси на студии.
„Со оваа донација создаваме услови за нашите студенти да се обучуваат со опрема што се користи и во водечките фармацевтски лаборатории. Ова е значаен чекор кон подготовка на идните професионалци за предизвиците во фармацевтската индустрија,“ изјави директорот на компанијата Трајанка Алексова.
На официјалното доделување, покрај деканот проф. д-р Зоран Стерјев присуствуваше и продеканката проф. д-р Ана Поцева Пановска, генералниот директор за Југоисточна Европа и еден од директорите на„Плива“ Михаел Фурјан, како и Трајанка Алексова директор на компанијата „Плива“ во Северна Македонија, заедно со група студенти кои моментално работат во лабораторијата.
„Плива“ уште еднаш покажа дека нејзината мисија не се фокусира само на развојот на фармацевтски производи, туку и на поддршка на образованието и науката. Опремата претставува значајна инвестиција во иднината на фармацевтските кадри во земјата, овозможувајќи им на студентите пристап до напредни технологии што ќе им помогнат во нивниот професионален развој.
Фармацевтскиот факултет и студентите упатија голема благодарност до „Плива“, оценувајќи ја оваа донација како важен поттик за унапредување на наставата и истражувањата.
