Во пријатна и опуштена атмосфера со многу позитивна енергија денеска во “Рагуза360” во Скопје, се одржа прогласувањето на победничките во македонскиот избор на “Жена на годината 2021” (www.zenanagodinata.mk), во склоп на конференцијата “Жени претприемачки”.
Во онлајн номинирањето учествуваа 434 луѓе, а дамите со најмногу номинации формираа листа од 50 финалистки во вкупно 10 категории за кои потоа гласаше жири составено од претставници на медиуми, компании, образовни институции и истражувачки агенции.
Во продолжение следува листата со овогодинешните лауреати во изборот “Жена на годината 2021”:
- Жена на годината – д-р Маја Мојсова Мијовска
- Жена менаџер на годината – Ленче Карпузовска
- Жена со трајни вредности – Винка Саздова
- Странец жена менаџер на годината – Букет Геречи
- Млада жена менаџер на годината (до 40 години) – Андреа Илоска Симоноска
- Жена со најголеми достигнувања во културата – Регина Икономовска
- Жена со најголеми достигнувања во спортот – Ирена Дишовска
- Жена со најголеми достигнувања за општеството – Дина Дума
- Жена со најдобар стил – Светлана Црнокрак
- Инфлуенсерка на годината – Елена Стефановска
Посебна награда од организаторите, за жена која континуирано ги поддржува, мотивира и инспирира жените претприемачи, беше доделена и за Лилјана Варадиновска.
Целта на изборот е да се оддаде признание на дамите кои со својот професионален и општествен ангажман секојдневно и во континуитет поставуваат високи стандарди на деловно и етичко однесување и остваруваат забележителни резултати.
Организатори на “Жена на годината” се Маркетинг365 и Касиа Евентс, а настанот е поддржан од Пивара Скопје, Тиквеш, Кариера.мк, Orbico, Империјал Тобако, Пеко, Охридски Бисер Филеви и др.
Во конференцискиот дел од настанот “Жени претприемачки”, на кој присуствуваа преку 200 жени претприемачки, се одржаа предавања на 4-ца врвни професионалци: Гордана Тасевска, Верица Јорданова, Јосе Дајанов и Зори Јаколин кои со присутните ги споделија своите приказни и искуства од претприемачките експедиции кои не секогаш им биле поплочени со рози и многупати за да достигнат до нивниот успех морале да преминат низ разни животни и деловни искушенија.
Неизбежен дел од настанот беше и оддавањето признание на дамите кои за време на пандемијата успеале да ги предводат своите тимови во создавањето на забележителни деловни резултати и по тој повод, организаторите доделија признаници на: Ивана Манчева Михајловска од Еуроимпекс за маркетинг менаџер, потоа признаница за дигитална трансформација на Маја Топкоска од ЗЕГИН, која успешно го спроведе процесот на дигитализација на продажбата на најголемата веледрогерија во Македонија и на Верица Јорданова од Иновативност.мк која беше ветерот во грб на сите претприемачи што беа доволно храбри да тргнат во бизнис експедиции во неизвесните времиња, активно промовирајќи ги и поддржувајќи преку својот медиум.
На настанот се одржа и промоција на научно-фантастичниот роман “Овириум” од авторот Агрон Усеини, а за музичкиот дел се погрижи Викторија Лоба која и го отвори настанот.
