Француската маркетинг групација Publicis Groupe соопшти дека постигнала договор за стекнување на Influential, истакната светска компанија за инфлуенсер маркетинг која автентично ги поврзува брендовите со публиката преку развивање, имплементација и оптимизирање на дигитални кампањи водени од онлајн креатори на содржини.
Influential важи за најголемата агенција за инфлуенсер маркетинг во светот според приходите, моментално опслужувајќи повеќе од 300 брендови, и тоа благодарение на нивната платформа со вештачка интелигенција со над 100 милијарди податочни точки, нивната мрежа од над 3,5 милиони креатори, вклучувајќи пристап и податоци за 90% од глобалните инфлуенсери со 1M+ следбеници.
Инфлуенсерскиот маркетинг прави револуција во медиумската и огласувачката индустрија и стана сеприсутен двигател за раст на брендовите ширум светот, поради уникатната способност на каналот да овозможува значајно поврзување помеѓу брендовите и потрошувачите. До 2025 година, огласувачките инвестиции во социјалните мрежи се очекува да достигнат 186 милијарди долари, за прв пат надминувајќи ги глобалните инвестиции за рекламирање во линеарната телевизија, при што инфлуенсерскиот маркетинг се наметнува како најбрзо растечки сегмент.
Диференцираната понуда на Influential им овозможува на брендовите да ангажираат висококвалитетни дигитални креатори на содржини, да подготвуваат влијателна креативна стратегија и да ги активираат, засилуваат и оптимизираат дигиталните медиуми за да доведат до реални резултати.
Предводена од основачот и извршен директор Рајан Детерт, Influential ќе биде позиционирана централно во рамките на Publicis Groupe, овозможувајќи им на сите клиенти и тимови на Publicis пристап до водечка технологија, експертиза и испорака на услуги во сферата на инфлуенсерскиот маркетинг.
„Големо задоволство е да им посакам добредојде на Influential во семејството на Publicis. Покрај нивната комерцијална платформа со вештачка интелигенција, бројот од 100 милијарди податочни точки, незаменливата мрежа од над 3 милиони креатори со пристап и податоци за 90% од влијателите со 1M+ следбеници, Influential е пред сè извонреден тим на таленти на самиот врв на нивниот сектор. Со оглед на тоа што новата економија на онлајн креатори следната година ќе ја надмине линеарната телевизија во огласувачки инвестиции, благодарение на Influential можеме целосно да го прифатиме нејзиното големо влијание и да ја ставиме на располагање на сите наши клиенти“ – истакнува Артур Садун, извршен директор на Publicis Groupe.
Договорот е предмет на исполнување на вообичаените правни процедури, вклучувајќи ги регулаторните одобренија, и се очекува да биде финализиран кон крајот на август 2024 година.
