Француската агенциска групација Publicis Groupe ја започнува 2025 година со спојување на агенциските мрежи Leo Burnett и Publicis Worldwide, создавајќи една комбинирана мрежа Leo која го отелотворува мотото „Power of One“.
Во време кога глобалните брендови и предизвици бараат голема креативност за да се придвижи обемна трансформација, персонализирани содржини и поврзани бренд искуства, новата мрежа Leo е дизајнирана да испорачува решенија за денешниот свет – со обединување на Leo Burnett, брендот на човечноста, и Publicis Worldwide, мрежата што се залага за трансформација, предводејќи ги промените за иднината преку моќта на единството.
Со проширување и редизајн на логото на Leo Burnett, новата мрежа Leo ја обединува моќта на едно од најпознатите имиња во огласувањето со иконичниот лав на Publicis за да формира глобална креативна сила составена од 8.000 креативни умови на Leo Burnett и 7.000 на Publicis Worldwide, со 8 агенции на годината во 90 земји и над 400 големи креативни награди.
Агенциската мрежа Leo ќе биде предводена од тимот што ја издигна Publicis Conseil во агенција на годината на Cannes Lions 2024, Марко Вентурели и Агата Буске, кои ќе дејствуваат како копретседатели, заедно со генералниот директор за стратегија, Герет Гудал. Заедно тие ќе бидат одговорни за глобалната креативна заедница и култура на Leo, кои ќе се активираат на локално ниво преку „Power of One“, обезбедувајќи им на креативните мислители и креатори директен пристап до податоците, технолошките и медиумските ресурси на групацијата Publicis. Ендрју Брус, извршен директор на Publicis Groupe во Канада, исто така ќе ја преземе дополнителната улога како претседател на Leo за Северна Америка.
Агенциската мрежа Leo ќе биде дел од креативната понуда на Publicis Groupe, заедно со мрежите Saatchi & Saatchi, LePub и BBH, потоа специјализирани креативни агенции како Fallon и The Community, како и Le Truc, единствениот креативен колектив кој работи на ниво на холдинг компанија.
„Јас ја имав привилегијата да ги водам и Publicis Worldwide и Leo Burnett. Оттогаш, други иконични имиња исчезнаа, но никогаш не сум верувал дека креативната ефикасност треба да значи помалку брендови и помалку операции. Потребни се големи идеи од креативни умови кои се негувани од силна агенциска култура, за да имаат влијание врз бизнисот на нашите клиенти. Во денешниот свет е потребна поголема соработка и поголем пристап до способности. Токму тоа го застапува Leo. Со обединување на духот и талентот на овие глобални креативни заедници, Leo ќе биде поголема, посилна и ќе отвора повеќе врати од кога било досега“ – истакна Артур Садун, генерален извршен директор на Publicis Groupe.
