Едноставното прашање на гласовните асистенти за новостите за некоја тема има потенцијал да го промени концептот на радиото и конзумирањето на информациите, пишува Nieman Lab во анализата за употребата на такви уреди. Производството на вести за гласовни асистенти бара дополнителни напори и ресурси во редакциите, а некои веќе се одлучија на вакви експерименти.
Додека една петтина од Американците поседуваат паметен звучник кој се активира на гласовни команди (еден од најпопуларните е Amazon Echo Dot, а вакви уреди произведуваат и Google, Apple и други компании) и додека употребата на гласовни асистенти расте, се помалку се користат радиото и социјалните мрежи, наведува Nieman Lab. Корисниците со гласовни команди може да му наредат на паметниот звучник да свири музика, да пронајде рецепт, да постави аларм или да одговори на некои прашања, а исто така, може да побара и вести.
“Ако гласот стане уште подоминантна сфера, тогаш тоа сигурно ќе има влијание врз начинот како се конзумираат информациите и другите содржини”, вели Мукул Девиченд, извршен уредник за глас и вештачка интелигенција на BBC.
За многу медиски издавачи, не е доведен во прашање растот на гласовната сфера, прашање е само дали производството на вести ќе расте со неа. Во моментов, и оние кои поседуваат гласовни асистенти немаат навика да бараат вести. Меѓутоа, Институтот за студии по новинарство на Ројтерс објави дека 18 проценти од Американците кои поседуваат ваков уред, секој ден бараат вести на начин што прашуваат: “Што има на вестите?” или нешто слично и дека добиваат информациите од медиумите по свој избор.
Сепак, подкастите не се прилагодени за пуштање преку гласовни асистенти и пребарувањето на вести директно од гласовните асистенти сеуште не е едноставно, а и оние кои се прилагодени, не се секогаш ажурни.
