Дисплеј со речиси нулта потрошувачка на енергија, што нуди ултра-ефикасно и флексибилно решение за бизнисите
Samsung Electronics Co., Ltd. денес ја објави глобалната промоција на својот нов 32-инчен Color E-Paper (модел EM32DX), дополнувајќи го своето портфолио на енергетски ефикасни решенија за дигитална сигнализација. Со напредната технологија на дигитално мастило, новиот модел овозможува ултра-ниска потрошувачка на енергија, висока видливост и лесен дизајн. На тој начин, тој претставува одржлива и флексибилна алтернатива за дисплеј за деловни намени.
„Samsung е посветен на унапредување на иновациите во дисплеј технологијата преку решенија кои ја зголемуваат интеракцијата, а истовремено ја намалуваат потрошувачката на енергија,“ изјави Хун Чунг, извршен потпретседател на бизнис секторот за визуелни дисплеи во Samsung Electronics. „Color E-Paper на Samsung им овозможува на бизнисите високо-ефикасни и прилагодливи решенија за сигнализација, кои комбинираат одржливост и перформанси.“
Енергетски ефикасна дигитална сигнализација со живописни бои
Новиот 32-инчен Samsung Color E-Paper функционира со 0.00W потрошувачка при статичен приказ. Благодарение на вградена батерија со целосно полнење, корисниците можат да го користат дисплејот целосно автономно, без приклучување на извор на енергија. При ажурирање на содржината, дисплејот и понатаму троши значително помалку енергија отколку традиционалните дигитални решенија, со што се овозможува оптимизација на трошоците.
Со QHD (2.560 x 1.440) резолуција, уредот користи напреден алгоритам за обработка на бои од Samsung, кој ја оптимизира точноста на боите и читливоста. На овој начин се добива мазна и привлечна слика, со ефект сличен на класичните хартиени постери или продажни дисплеи. За бизнисите, ова овозможува природен премин од печатени материјали кон дигитални решенија со зголемена привлечност.
Тенок, лесен и лесен за инсталација
Со тежина од само 2,5 кг и дебелина од 17,9 мм, овој дисплеј нуди ултра тенок дизајн кој овозможува флексибилно поставување на ѕидови, маси или тавани, благодарение на додатоците за закачување што доаѓаат со уредот. Со рамки од 13,9 мм од сите страни, дисплејот нуди висока функционалност во пеизажен или портрет режим, а VESA-стандардот овозможува дополнителни можности за инсталација. Со две USB-C порти, Wi-Fi и Bluetooth конективност, и 8 GB вградена меморија, уредот овозможува лесна интеграција и управување со содржината.
Паметно управување со содржината за бизниси
Достапна за Android и iOS уреди, наменетата апликација Samsung E-Paper овозможува лесно креирање на содржина, закажување и управување со дисплејот. Дополнително, платформата Samsung VXT (Visual eXperience Transformation) – која нуди далечинско управување во реално време и интуитивно управување со содржината – сега е компатибилна и со Color E-Paper. Ова овозможува централно управување со уредите и лесна интеграција со постоечките системи за дигитална сигнализација.
Samsung VXT вклучува и посебна функција за оптимизација на видливоста на содржината и преглед на боите пред објавување. За бизнисите, VXT исто така овозможува следење во реално време и централно управување со уредите, што ја олеснува дистрибуцијата на содржина низ повеќе локации. Со поддршка од Samsung Tizen 8.0, уредите може беспрекорно да се интегрираат со постоечките системи преку Tizen Enterprise API.
Дополнително, во рамките на својата поширока посветеност на одржливост, Color E-Paper користи 55% рециклирана пластика во надворешниот дел и доаѓа во целосно хартиено пакување – потврдувајќи ја заложбата на брендот за намалување на влијанието врз животната средина.
Континуирано лидерство на глобалниот пазар за дигитална сигнализација
Samsung ја зацврсти својата позиција како водечки светски производител на дигитална сигнализација, држејќи го првото место веќе 16-та година по ред – од 2009 година до денес.
Во 2024 година, Samsung постигна рекорден удел на пазарот од 34,6% во светската продажба на дигитална сигнализација според обемот. За повеќе информации за Samsung Color E-Paper, посетете ја www.samsung.com/business.
