Популарната „менувачница“ за дигитални валути Gemini соопшти дека нејзините корисници сега може да купуваат криптовалути преку Apple Pay и Google Pay.
Корисниците само ќе треба да ја поврзат својата дебитна картичка со Apple Pay или Google Pay (кредитни катички засега не се поддржани) и ќе можат да купуваат криптовалути по свој избор со помош на мобилната апликација на Gemini.
Апликацијата им овозможува на корисниците да купуваат преку 30 различни криптовалути, вклучувајќи ги најпознатите Bitcoin, Ether и Litecoin. Платформата Gemini е достапна во над 50 држави ширум светот, а новата опција е поддржана во секоја земја која го дозволува користењето на Apple Pay и Google Pay.
Средствата може да бидат подигнати еден час по оствареното купување.
„Поддршката на Apple Pay и Google Pay е чекор понатаму во нашата мисија да ѝ дадеме моќ на индивидуата преку криптовалутите, така што овозможуваме уште еден лесен начин како да се пристапи до овој нов и возбудлив дигитален фронт“, истакнуваат од Gemini.
