Словенечко-хрватскиот видео проект развиен со вештачка интелигенција, создаден од креативното студио Digital Da Vincis за компјутерскиот музеј PEEK&POKE во Ријека, е официјално номиниран за 29-те Webby Awards, познати како “интернет Оскари”, кои од 1997 година ги слават најдобрите дигитални проекти во светот.
Номинираниот проект, насловен „Alternate Re[AI]lity“, се натпреварува во категориите AI, Immersive & Games во делот Best in Arts, Culture & Events. Ова е првата номинација за Webby наградите за проект од Словенија, и истовремено го истакнува креативниот потенцијал на Хрватска.
Инаку, „Alternate Re[AI]lity: Компјутерска историја околу 1890 година“ се состои од серија видеа за социјалните мрежи која преку AI технологија замислува како би изгледал светот на компјутерите и гејмингот кон крајот на 19. век. Форматот потсетува на тивки архивски филмови и креира фиктивен документарец за „иновативни“ технологии од пред 130 години. Проектот користи автентични експонати од музејот PEEK&POKE – од првите компјутери, конзоли, телефони до вселенска опрема – обработени со алатки како Midjourney, Runway, Pika, Luma и AI музичкиот генератор Udio.
Кампањата веќе освои сребро на Epica Awards и бронза на Anthem Awards, со што се потврди и на меѓународната креативна сцена. Овој пат, на Webby Awards, проектот се натпреварува рамо до рамо со светски имиња како Google, музејот на Салвадор Дали, Ријксмусеум од Амстердам и агенцијата Norday од Холандија.
„Да се биде номиниран за награда што ја нарекуваат ‘интернет Оскар’ е врвно признание за секој дигитален креатор. Она што ја прави оваа номинација уште повредна е контекстот – про-боно проект за мал, но извонреден компјутерски музеј во Ријека, кој целосно го водат волонтери. Денес сме рамо до рамо со имиња како Apple, Netflix, Nike, Google, музејот на Дали, Kendrick Lamar и Lady Gaga. Оваа номинација докажува дека не ти треба голем буџет за да создадеш големо влијание – доволни се идеја, креативност и малку лудост“ – посочува Кирил Карновиќ-Валуа, креативен директор на Digital Da Vincis.
„Овој проект беше наш начин да го истражиме креативниот потенцијал на вештачката интелигенција – не само како алатка, туку и како раскажувач. Сакавме да создадеме содржина за социјалните мрежи што е забавна, иновативна и културно релевантна. Во исто време, се обидовме да го пренесеме и уникатното искуство од посетата на нашиот музеј во Ријека. Ние сме мал тим – и затоа ова признание ни значи особено многу“ – додава Давор Пасариќ, креативен директор на музејот PEEK&POKE.
Webby Awards оваа година прими речиси 13.000 пријави од над 70 држави, а само 12% влегоа во финалниот круг. Добитниците ќе бидат објавени во вторник, 22 април, а свечената церемонија ќе се одржи во понеделник, 12 мај во Њујорк, со водителка Илана Глејзер. Наградите ги доделува Меѓународната академија за дигитална уметност и науки (IADAS).
