Американскиот телевизиски сервис DirecTV го објави новото продолжение на својата кампања насловена „Get Your TV Together“ („Среди си го телевизорот“), во кое ѕвездите на реалити серијалот „The Real Housewives“ се соочуваат во натпревар на американски фудбал со тимот на Dallas Cowboys.
Хумористичниот спот почнува со сцена во која една жена на својот партнер му ги објаснува придобивките од DirecTV, односно можноста да гледа телевизија во живо и на барање, така што со голема брзина наизменично менува помеѓу натпревар на американски фудбал и епизода на „Вистинските домаќинки“.
Но, во еден момент на надреалност, двете програми се спојуваат во едно, па така „Вистинските домаќинки“ предводени од Тереза Џудис, Кајл Ричардс и Кенија Мур се соочуваат во натпревар на американски фудбал со ѕвездите на Dallas Cowboys предводени од квотербекот Дак Прескот и примачот СиДи Лемб.
Она што следи е низа на хумористични интеракции и евентуална симбиоза на двете публики, кои почнуваат да споделуваат интерес за двете различни програмски содржини.
Кампањата се реализира со помош на креативната агенција TBWA\Chiat\Day од Лос Анџелес.
