Двете најголеми американски компании за е-трговија, Amazon и Walmart, започнаа со тестирање на систем за достава до дома со помош на дронови.
Минатата недела, Amazon доби дозвола од Федералната агенција за авијација на САД да започне со тестирање на комерцијални достави со помош на дронови. Тестирањата треба да понудат вредни податоци за безбедносните аспекти на еден таков потфат, пред тој да биде ставен во редовна употреба.
Оваа недела пак, најголемиот конкурент на Amazon, Walmart, започна сопствена програма за тестирање на достава со дронови во градот Фејeтвил во Северна Каролина, кој има околу 200.000 жители. Дроновите кои ги користи Walmart се создадени од компанијата Flytrex, позната по развојот на дронови за достава.
„Дроновите, кои се контролирани над облаците со помош на паметна и едноставна контролна табла, ќе ни помогнат да добиеме значаен увид во корисничкото и соработничко искуство – од изборот и пакувањето на производите, до полетувањето и доставата,“ стои во соопштението на Walmart.
Според Том Вард, постар потпретседател за кориснички производи на Walmart, ќе биде потребно извесно време пред доставата со дронови да биде нашироко прифатена во државата.
