Платформата за видео содржини YouTube го претстави својот нов глобален визуелен идентитет по повод 20-годишнината од своето постоење, воведувајќи го првиот официјален систем на „подвижен идентитет“ (“motion identity”), заедно со освежен изглед низ сите свои сервиси. Промените се однесуваат на YouTube Shorts, Music, TV, Premium и Kids, со цел да се воспостави поголема поврзаност во рамките на бренд-екосистемот кој со текот на годините станал сè пофрагментиран.
Новиот идентитет е развиен внатрешно од страна на YouTube Creative Studio и е насочен кон создавање пообединет и подинамичен впечаток за платформата. Наместо целосна трансформација, YouTube ги задржа препознатливите елементи – основните бои и визуелните референци од корисничкиот интерфејс – кои сега се дополнително доработени за да функционираат пофлексибилно низ маркетингот, продуктите и културните контексти.
Според раководителот на проектот, Киран Мистри, целта не била „повторно да се измисли YouTube“, туку да се создаде систем што ќе ги поврзе неговите бројни сегменти. Новиот пристап тежнее кон кохезивност, без наметнување униформност, оставајќи простор различните производи и региони да го задржат сопствениот израз, а притоа да не се изгуби заедничкиот визуелен јазик.
Движењето е во самото средиште на ребрендирањето и го означува првиот формален „подвижен идентитет“ на YouTube. Суптилни ефекти, како нежно „тресење“ на камерата, се инспирирани од природната динамика на содржината што ја создаваат креаторите. Новиот дисплеј фонт и ажурираните илустрации дополнително го поддржуваат брендот, овозможувајќи му на YouTube да се прилагодува глобално, а сепак да остане веднаш препознатлив.
Со ова освежување, YouTube ја зацврстува својата трансформација од чисто функционална платформа во целосно оформена дестинација за забава. Овој чекор доаѓа во време на забрзани промени во пејзажот на социјалните медиуми, обликувани од развојот на генеративната вештачка интелигенција, проширувањето на функционалностите за е-трговија и растечката улога на видеото како медиум за откривање и купување производи.
Паралелно со тоа, YouTube го продлабочува своето присуство на поврзаните ТВ-уреди и интензивно инвестира во кратката видео-форма преку Shorts, со што се позиционира во сè подиректна конкуренција со стриминг платформите како Netflix. Како одраз на овој раст, приходите од огласување на YouTube забележаа зголемување од 15% на годишно ниво, достигнувајќи 10,26 милијарди долари во третиот квартал – показател за сè поголемото влијание на платформата во глобалниот медиумски простор.
