Во овогодинешното главно обраќање за состојбата на американскиот бизнис, претседателката и извршна директорка на Стопанската комора на САД, Сузан П. Кларк, ја бранеше слободата на американскиот бизнис во енергичен и оптимистички говор во седиштето на Комората во Вашингтон, кој што беше емитуван пред илјадници деловни лидери и партнери во сите 50 американски сојузни држави и во повеќе од 100 други земји ширум светот.
„Состојбата на американскиот бизнис е оптимистичка. Оваа земја, нејзините граѓани и лидери и нашите партнери ширум светот треба да го слушнат тоа“, рече Кларк. „Има многу критичари кои сакаат да ви кажат сè што не е во ред со капитализмот. Но, вистината е дека тоа е само добра новинска приказна“.
Во својот говор, Кларк јасно стави до знаење дека мисијата на Комората денес е иста како и кога организацијата била основана пред 112 години: „Да се брани, заштити и промовира слободниот бизнис“.
Сите имаат придобивка од пазарниот динамизам и соработка
И покрај тврдењата на критичарите дека секој пазар нужно создава победници и губитници, Кларк возврати дека пазарите што правилно функционираат создаваат придобивки за милијарди луѓе секој ден.
„Да, пазарите се компетитивни“, рече Кларк. „Циничните го гледаат тоа како игра со нулта сума, но тие грешат. Оптимистот со право ја гледа конкуренцијата како креативна сила. Неуспехот води до учење – и често е предуслов за успех. Победниците го земаат својот профит и наоѓаат нови проблеми за решавање. Конкурентите учат од успехот на другите и поттикнуваат континуиран напредок.“
Кларк истакна дека пазарите создаваат придобивки за сите – дека милијардите мали интеракции што се случуваат секој ден – имаат растечко и поттикнувачко влијание врз општеството како целина.
„Пазарите се исто така колаборативни. Тие им овозможуваат на луѓето низ синџирот на снабдување кои никогаш не се ни сретнале помеѓу себе да интегрираат и да иновираат извонредно сложени производи што ниту една личност или компанија не би можела да ги направи сама“, рече Кларк. „Направете збир на сето тоа и најголемите победници сме сите ние. Нашите семејства, нашите заедници, нашата земја и нашиот свет“.
Зошто Комората промовира раст
Кларк додаде дека слободниот бизнис поттикнал иновации кои радикално го подобриле квалитетот на живот.
„Луѓето имаат повеќе избор отколку што некогаш имале, без разлика дали се работи за житарки за појадок, патики или за кариера“, рече Кларк. „Можеме да досегнеме до повеќе места во светот, поефикасно и поприфатливо. Начините на транспорт што нè одведуваат таму се побезбедни отколку кога било досега“.
Уште повеќе, иновациите што ги создава пазарот се шират пошироко отколку што многумина мислат, додаде Кларк.
„Општеството како целина ги жнее огромните придобивки од пазарните иновации. Можеби размислувате за технологиите кои го менуваат светот – интернетот, паметниот телефон, социјалните мрежи, вештачката интелигенција – како непроценливи“, рече Кларк. „Економистите најдоа начин да го квантифицираат она што го нарекуваат „социјален вишок“ – 98 отсто од вредноста на новата технологија оди кај милијарди луѓе кои ја користат, додека компанијата или претприемачот што ја измислил добива околу два отсто“.
Кларк исто така објасни дека Комората поддржува политики кои го поттикнуваат економскиот раст бидејќи растот е од корист за локалните заедници и луѓето што живеат во нив.
„Побрзо растечката економија генерира повеќе даночни приходи за плаќање на образованието, одбраната, основните истражувања, транспортот и инфраструктурата и социјалната заштита. Тоа ја поттикнува филантропијата и ги финансира уметноста, забавата и културата кои ги збогатуваат нашите животи. Што е најважно, растот става повеќе пари во џебовите на луѓето за да можат да се грижат за своите семејства и да ги остварат своите цели“, рече Кларк. „Затоа – во унапредувањето на нашата мисија – Комората цврсто се залага за политики што се про-растечки“.
Протекционизмот ги кочи пазарите и нивните придобивки
Кларк ги предупреди креаторите на политики дека протекционизмот ги ограничува придобивките од пазарите. Спротивно на тоа, правилните трговски договори можат да ги зајакнат домашните работници, положбата на Америка во светот и на нејзините сојузници.
„Просперитетните нации се стабилни нации – тие стануваат партнери, сојузници и противтежа на авторитаризмот“, рече Кларк. „Глобалниот тренд на протекционизам – вклучително и овде во САД – го става сето ова на ризик. Да се свртиме навнатре – да се креваат трговски бариери, да се наметнуваат тарифи, да престанеме да склучуваме трговски договори, реактивно да ги репатрираме синџирите на снабдување – значи да ѝ нанесеме штета на нашата сопствена економија. Тоа им ги одзема новите можности на нашите бизниси и работници и ги зголемува цените за секој Американец“.
Улогата на властите во свет воден од пазарот
Кларк ја повтори виталната важност да се постигне вистинската улога на властите во системот на слободниот пазар.
„Улогата на власта е да ги негува условите што го овозможуваат човечкиот потенцијал и ги зајакнува бизнисите да им служат на луѓето, да решаваат проблеми и да го зацврстат општеството“, рече Кларк. „Тоа значи да им дозволиме на пазарите да работат и да ги заштитиме од упадот на властите. Носење на јавни политики кои се про-растечки, остварливи и предвидливи. Поставување паметни регулативи кои јасно им сигнализираат на бизнисите за правилата на движење и исполнување на основните должности на властите да биде отворени и функционални“.
На крајот, Кларк ги повика слушателите да се приклучат на Комората оваа година и да се заложат за слободниот бизнис.
„Оние кои веруваат во слободниот бизнис – оние кои го живееле и биле издигнати од него – мора да станат и да го кажат тоа“, рече Кларк. „Ако секој од нас застане – на големи и на мали начини – можеме да испратиме порака што ќе им се спротивстави на циниците и песимистите. И ако го направиме тоа сите заедно, со обединет глас, можеме да започнеме движење за спас на системот што ќе ја обезбеди нашата колективна иднина. Комората на САД и нашите партнери гордо ќе го водат патот“.
