Компанијата Амазон го смени главното лого на апликацијата за шопинг после реакцијата на купувачите на кои последниот редизајн им наликуваше на Адолф Хитлер.
Иконата на апликацијата беше објавена во јануари и на неа беше поставен дел од сина трака веднаш над препознатливото „насмеано“ лого на компанијата.
Меѓутоа, на многумина таквата лента им наликуваше на мустаќите кои ги носеше нацистичкиот водач. Следејќи ги реакциите на купувачите, технолошкиот гигант го промени дизајнот, превиткувајќи дел од сината трака настрана.
Компанијата за Би-Би-Си изјави дека оригиналната верзија е објавена во неколку земји пред да се изврши промената.
„За жал, визуелизациите на нивната трака на оригиналното лого веднаш се поврзуваат со мустаќите на Хитлер, бидејќи овој вид мустаќи е засекогаш всаден во нашата потсвест. Тоа не е баш најдобрата асоцијација за бренд што претендира во старт да обезбеди задоволство“, изјави Вики Булен, извршен директор на агенцијата за брендирање „Коли Портер Бел“.
На логото на апликацијата, кое може да се види на паметните телефони и таблети, претходно се наоѓаше графика на количка за шопинг.
Сега новиот дизајн е украсен со пратка со кремаста боја, на која се наоѓа карактеристичната „насмевка“ – логото на компанијата и сина трака.
„Новото лого е дизајнирано да ги пробуди исчекувањето, возбудата и радоста кои следат кога купувачите ќе започнат шопинг патување на своите телефони, исто како кога ќе ја видат нашата пратка на нивниот куќен праг“, велат од Амазон.
Лора Велдон, основач на компанијата за дизајн на брендови „Студио ЛВД“, додаде дека „брендовите постојано ги менуваат и редизајнираат своите логоа. За Амазон беше добро тоа што ги послуша купувачите. Јасно е дека тие се грижат за тоа што ќе кажат нивните клиенти и ги ставаат во центарот на она што го прават.“
Лицето на Хитлер е толку препознатливо што некои тврдат дека го гледаат во одредени предмети и објекти.
Така, во 2011 година, сликата на куќа во велшкиот град Свонси стана вирална бидејќи наликуваше на нацистичкиот диктатор.
Слични ситуации се забележани кај некои други брендови.
Спортскиот бренд Умбро беше критикуван во 2002 година, бидејќи моделот на нивните патики беше именуван како отровен гас со кој нацистите убија милиони луѓе низ цела Европа.
