За време на одржувањето на октомвриското издание на Lions Live (19-23 октомври), креативниот фестивал Cannes Lions го лансираше дигиталниот мастербренд LIONS.
Се работи за дигитална платформа чија цел е да го прошири меѓународниот фестивал на креативноста во целогодишна платформа заснована врз четири основни столбови: заедница, интелигенција, учење и поставување стандарди.
Како дел од лансирањето на платформата, беше ообјавен и серијал од пет рекламни спотови во должина од по 2 минути. Спотовите претставуваат колажи од некои од најуспешните огласувачки кампањи во изминатите неколку децении, пропратени со нарација од пет светски признати маркетери.
Наратори на спотовите се: Теа Угло, креативен директор на Creative Lab на Google од Сиднеј; Јанг Јео, генерален креативен директор во Hakuhodo International од Сингапур; ПиЏеј Переира, креативен претседател и ко-основач на Pereira O’Dell од Сан Франциско; Џоси Пол, претседател и генерален креативен директор на BBDO India од Мумбај; и Чака Собани, генерален креативен директор на Leo Burnett од Лондон.
Спотовите ќе бидат стримувани преку Lions Live и се достапни за гледање на официјалниот YouTube канал на Lions.
Околу 80.000 луѓе од 145 земји низ светот се регистрирани да бидат дел од заедницата на Lions Live, што според управниот директор на фестивалот, Симон Кук, е: „сведоштво за апетитот на индустријата да учи за креативната извонредност и да биде дел од една разновидна, глобална заедница со споделена визија и убедување.“