Белгискиот пивски конгломерат Anheuser-Busch InBev, во чија сопственост се познати брендови како Budweiser, Corona, Stella Artois, Beck’s и многу други, беше прогласен за „Креативен маркетер на годината 2022“ од страна на фестивалот Cannes Lions.
Cannes Lions е светски најголемиот адвертајзинг фестивал, кој веќе долги години ги наградува оние светски огласувачи кои демонстрирале креативна извонредност во својата работа. Наградата за „Креативен маркетер на годината“ во 2021 му припадна на Microsoft, а досега била доделена и на компании како Apple, Coca Cola, Google, Samsung Electronics и други.
Оваа година, наградата отиде на адреса на AB InBev поради фактот што пивската компанија освоила вкупно 40 награди на фестивалот во изминатите две години, вклучувајќи и две Grand Prix награди.
Во соопштението по повод наградата, AB InBev изразија особена благодарност до нивната in-house креативна агенција Draftline за извонредно завршената работа на повеќе светски пазари како САД, Австралија, Колумбија и Јужна Кореја.
Овогодишното издание на меѓународниот фестивал на креативноста Cannes Lions е закажано од 20 до 24 јуни 2022, во Кан, Франција.