Компанијата за видео-игри Electronic Arts објави дека популарната британска пејачка со косовско потекло Дуа Липа станува дел од фудбалската игра FIFA 21.
Играчите кои сакаат да ги испробаат виртуелните фудбалски вештини на Дуа Липа тоа ќе може да го сторат откако ќе ја ажурираат играта со инсталација на новиот „patch“.
Со новите ажурирања, кон играта ќе бидат додадени и други познати имиња, дел фудбалски (поранешни и сегашни) – како Дејвид Бекам, Зинедин Зидан и Ерлинг Халанд, а дел од други сфери на спортот и забавата, како Формула 1 возачот Луис Хамилтон и секако, она што предизвика најмногу внимание во јавноста – Дуа Липа.
Таа е всушнот првиот женски лик кој е воведен во играта. Од компанијата се надеваат дека нејзиното вклучување ќе привлече поголем број на девојчиња и девојки да се посветат на фудбалската игра, а дел од нив да станат и професионални фудбалерки.
