Платформите за лиценцирање на визуелни содржини Getty Images и Shutterstock соопштија дека постигнале дефинитивен договор за спојување. Комбинираната компанија, која би имала вкупна вредност од речиси 3,7 милијарди долари, ќе се вика „Getty Images Holdings, Inc“ и ќе продолжи да тргува на Њујоршката берза под симболот „GETY“.
Како комбинирана компанија, Getty Images и Shutterstock ќе понудат библиотека со содржини со поголема длабочина и широчина во корист на клиентите, проширени можности за својата заедница на соработници и засилена посветеност на усвојување на инклузивна и репрезентативна содржина. Дополнително, посилниот финансиски профил на комбинираната компанија се очекува да создаде зголемен капацитет за инвестирање во производи и иновации за клиентите во брзо-развивачка и високо конкурентна средина – стои во објавеното соопштение.
Сето ова значи дека комбинираната компанија ќе биде добро позиционирана да ги задоволи потребите на креативните, медиумските и огласувачките индустрии преку комбинирани инвестиции во креирање содржини, покривање настани и иновации на производи и технологија.
„Денешната вест е возбудлива и трансформативна за нашите компании, отклучувајќи повеќе можности да ја зајакнеме нашата финансиска основа и да инвестираме во иднината – вклучително и за подобрување на нашите понуди на содржини, проширување на покриеноста на настани и испорака на нови технологии кои подобро ќе им служат на нашите клиенти. Со забрзаниот раст на побарувачката за привлечна визуелна содржина низ индустриите, никогаш немало подобро време нашите два бизниси да се здружат. Со комбинирање на нашите комплементарни јаки страни, можеме подобро да одговориме на барањата на клиентите, притоа давајќи им исклучителна вредност на нашите партнери, соработници и акционери“ – истакнува Крег Питерс, генерален извршен директор на Getty Images.
„Возбудени сме од можностите што ги гледаме да ја прошириме нашата библиотека со креативни содржини и да ја подобриме нашата понуда на производи за да одговориме на различните потреби на клиентите. Очекуваме спојувањето да произведе вредност за клиентите и акционерите на двете компании преку капитализирање на атрактивни можности за раст кои ќе ги поттикнат комбинираните приходи, забрзување на иновациите на производите, остварување значителни синергии на трошоците и подобрување на готовинскиот тек. Со нетрпение очекуваме да работиме тесно со менаџерскиот тим на Getty Images за да ја комплетираме трансакцијата и да го предводиме следното поглавје од нашиот раст“ – додава Пол Хенеси, генерален извршен директор на Shutterstock.
Пред да биде финзализиран, договорот најпрвин ќе мора да го помине антимонополскиот филтер и да биде одобрен од американските регулаторни власти.
