Пивскиот бренд Heineken објави “Водич за зелени пабови” (“Green Pub Guide”) во кој се претставуваат повеќе пабови ширум Британија кои се стремат да го намалат својот јаглероден печат и да го минимизираат отпадот, како начин да инспирира повеќе пабови да преземат активности за одржливост.
Водичот, кој е дел од амбициозните заложби на Хајнекен за поттикнување позитивно влијание врз животната средина, претставува 55 британски пабови, барови и ресторани кои имаа преземено значителни чекори за намалување на своето негативно еколошко влијание.
Еден од локалите кои се наоѓаат во водичот, по име “The Green Man”, е во сопственост на Кендис Брау, која е победник на кулинарското шоу The Great British Bake Off и воедно партнер на кампањата.
Публикацијата има за цел да ги охрабри другите пабови ширум земјата да се инспирираат и да разгледаат начини за подобрување и зајакнување на нивната зелена репутација.
Водичот е достапен онлајн и вклучува целосни детали за врвните зелени места, наведувајќи ги мерките што ги преземаат за да бидат поодржливи. Клучните иницијативи од кои судиите беа особено импресионирани вклучуваа: менија со локална и домашна храна; одржливи реновирања и проширувања; намалување на отпадот и непотребното трошење на вода и CO2 со опрема како што е SmartDispense, иновативни решенија за точење на пиво и слично.
Директорката за одржливост во Хајнекен, Челзи Вро, истакнува: “Пабовите се камен-темелник на британската култура, натопени во традиција и восхит од љубезните заедници надолго и нашироко низ земјата. Сега, повеќе од кога било, клучно е пабовите да направат нешто за планетата со преземање чекори – големи и мали – да го намалат нивното влијание врз планетата и да го направат искуството во пабот малку позелено.”
