(31.08.2020) – Шведскиот бренд за мебел IKEA се здружи со данскиот бренд за играчки LEGO со цел да ја создадат совршената кутија за малите и големи љубители на лего-коцките.
Новиот производ, насловен BYGGLEK (некоја верзија на „гради и играј“ на шведски), е всушност бела кутија наменета за складирање на лего-коцките, која истовремено ќе може да служи и како платформа за нивно составување.
Имено, капакот од кутијата ќе има „столпчиња“ за додавање на лего-коцки, а играчките ќе може едноставно да се чуваат во кутијата без воопшто да биде потребно да се растури започнатата конструкција – сé додека „проектот“ не биде целосно готов. Навистина паметно и прагматично.
Новите кутии на IKEA и LEGO ќе бидат достапни во неколку различни големини со цена од 10 до 15 долари по кутија, а нивната продажба се очекува да започне од октомври 2020.
