Инженерската институција на Македонија, по втор пат, годинава избира Млад инженер на годината. Институцијата ги повикува сите млади инженери до 35 години (вклучувајќи и 35 години) да се пријават на повикот што трае до 8 февруари 2026 година на следниот линк: https://forms.gle/
Освен возраста, новиот Млад инженер на годината ќе се избира согласно постигнатите инженерски резултати во 2025 година, лидерството и инспирацијата за младите; креативноста и иновативноста; споделувањето знаење, ангажирањето во заедницата и општествено и етичкото влијание на околината.
Повод за доделување на признанието е 21 март – Денот на македонските инженери. Целта на оваа иницијатива е да се промовираат младите инженери на национално и меѓународно ниво што ќе придонесе младите луѓе да се насочуваат кон инженерска професија.
Наградата за новиот Млад инженер е платено учество на Европската конференција на млади инженери. Од сите пријавени кандидати, во потесна селекција ќе бидат избрани 5 лица за кои гласа Комисија на ИМИ и од нив се избира победникот. Комисијата брои најмалку 23 члена и е составена од претставници на Клубот на млади инженери, Клубот на носители на инженерски прстен, медиуми, студенти, професори, соработници на ИМИ, претставници од компании-партнери на ИМИ и јавни личности.
Свеченото прогласување на новиот млад инженер ќе се одржи во март годинава по повод Денот на македонските инженери. Минатата година со ова Признание се закити Филип Попоски од Машинскиот факултет при Универзитетот „Св. Кирил и Методиј“ – Скопје. Тој го доби признанието за професионални достигнувања во изминатата година. На конкурсот во 2025 година се пријавија 52 кандидати, а Попоски беше избран анонимно од жири составено од 47 претставници од медиумите, компании, академската заедница и јавниот живот.
Партнер на настанот е Друштвото за комуникациски менаџмент Чептер 4.
