Инфлуенсерите понекогаш знаат да бидат проблематични. Да, имаат голема публика и знаат како да го „здрмаат“ Инстаграм, но тие исто така имаат лоша навика да кажат или направат и некои прилично глупави работи кои на нивните спонзори им предизвикуваат главоболки. Сепак, тие се луѓе. Но, што ако не беа?
Виртуелните инфлуенсери се по малку чуден новитет со кој експериментираат брендовите – Lil Miquela, Shudu и Blowko се меѓу попознатите виртуелни ѕвезди активни на социјалните медиуми во моментот. Овие вештачки генерирани личности го имаат сиот „шарм“ на инфлуенсерите од „крв и месо“, меѓутоа без човечката непредвидливост (игнорирајќи го фактот дека, секако, профилите на виртуелните инфлуенсери ги водат луѓе).
Кон овој нов тренд неодамна се приклучи и брендот за брза храна KFC, кој заедно со својата агенцијата Wieden + Kennedy го претворија основачот на компанијата, популарниот Полковник Сандерс, во виртуелен инфлуенсер. И тоа каков.
Низ сатиричниот дух по кој се познати KFC, половникот добро се снајде во инфлуенсерскиот живот. Kога не ги покажува своите стомачни мускули, брендирани тетоважи или филозофира за тоа како да се биде свој, тој е „едно со природата“ на оној самобендисан и „кринџи“ начин кој само вистинските инфлуенсери го можат.
