Во свет во кој вештачката интелигенција ја „опседна“ поп-културата, еден од најпознатите брендови во светот на фотографијата, Nikon, започна кампања под концептот „Не се откажувајте од реалниот свет“.
Милиони луѓе ширум светот генерираат надреални слики само со внесување на неколку клучни зборови на веб-локација, што директно влијае врз фотографите, особено во места со помалку ресурси. Во Латинска Америка, на пример, брендовите сè помалку ги ангажираат фотографите за публицистички и огласувачки цели, па тие полека губат простор, работа и приходи.
Кампањата насловена „Природна интелигенција“, создадена од Nikon и агенцијата Circus Grey за пазарот во Перу, оди отворено против вештачката интелигенција – прикажувајќи фотографии од природни места во нашиот свет кои се почудни од фикцијата, снимени од фотографи со помош на фотоапаратите на Nikon.
Притоа, фантастичните фотографии се проследени со соодветно надреален текст, во стил на опис кој би требало да биде внесен во генераторите на слики базирани на вештачка интелигенција.
„Никон има важна посветеност кон сите фотографи во светот, кои со својот талент и уметност ни овозможија да уживаме во најубавите и најневеројатните слики, па затоа ни беше толку важно да преземеме иницијатива и да го поддржиме она што како бренд секогаш ни давало цел и значење – фотографијата“. истакнува Чарли Толмос, генерален креативен директор на креативната агенција Circus Grey Peru.
Според брендот, пораката била примена позитивно од перуанската фотографска заедница со зголемување на продажбата, но што е најважно, ги инспирирала луѓето да ги земат своите фотоапарати и да излезат во природата.
