Во пресрет на најголемиот спортски настан во државата досега, во сабота во Ист Гејт Мол посетителите ќе имаат можност да учествуваат во различни спортски и забавни активности, вклучувајќи турнири во 3х3 баскет, натпревари во забивање и презентации поврзани со олимписките вредности и спортот.
По успешното одржувањe на Chefs de Mission семинарот во хотелот „Холидеј Ин“ во Скопје, финалните подготовките за Европскиот младински олимписки фестивал – ЕМОФ Скопје 2025 продолжуваат со зголемен интензитет. Семинарот собра претставници од 49 европски олимписки комитети, кои се запознаа со организациските аспекти, спортските објекти и логистичките капацитети на градовите домаќини Скопје и Куманово. Овој пленум беше од клучно значење за координација и размена на искуства, со цел обезбедување на успешна реализација на фестивалот.
Во пресрет на најголемиот спортски настан во државата досега, организацискиот тим најавува уште еден важен момент во одбројувањето до ЕМОФ Скопје 2025. На 12 април (сабота), во трговскиот центар Ист Гејт Мол, ќе се одржи настанот „Одбројување 100 дена до ЕМОФ“, кој има за цел да ја подигне свеста и возбудата кај јавноста за претстојниот фестивал, кој ќе се одржи од 20 до 26 јули. Посетителите ќе имаат можност да учествуваат во различни спортски и забавни активности, вклучувајќи турнири во 3х3 баскет, натпревари во забивање, шутирање од далечина како и презентации поврзани со олимписките вредности и спортот.
Дополнително, манифестацијата ќе има и хуманитарен карактер, со посебен фокус на поддршка на семејствата погодени од неодамнешната трагедија во Кочани. Преку оваа иницијатива, организаторите сакаат да ја покажат солидарноста и заедништвото на спортската заедница и граѓаните на Македонија. Собраните средства ќе бидат наменети за помош и поддршка на овие семејства, со цел да се ублажат последиците од несреќата.
Настанот „100 дена до ЕМОФ“ претставува одлична можност за младите и сите љубители на спортот да се запознаат поблиску со концептот на Европскиот младински олимписки фестивал, неговото значење и влијание врз младинскиот спорт во Европа. Преку учество во планираните активности, посетителите ќе можат да го почувствуваат олимпискиот дух и да станат дел од одбројувањето до почетокот на фестивалот. Оваа манифестација е исто така и повик до сите заинтересирани да се вклучат како волонтери или поддржувачи на ЕМОФ Скопје 2025, придонесувајќи кон успешна организација и реализација на настанот.
Со оглед на значењето на ЕМОФ Скопје 2025 како најголем спортски настан во историјата на Македонија, ваквите активности се од суштинско значење за мобилизирање на заедницата, промоција на спортските вредности и создавање на позитивна енергија која ќе го одбележи целиот фестивал. Организаторите ги повикуваат сите граѓани, спортски ентузијасти и медиуми да присуствуваат на настанот во Ист Гејт Мол на 12 април и заедно да го започнат одбројувањето до овој значаен спортски собир.
Ова лето, повеќе од 4.000 учесници, вклучувајќи 900 волонтери, ќе бидат дел од ЕМОФ Скопје 2025, кој ќе се одржи од 20 до 26 јули. Натпреварите ќе се одржат во 15 спортови: атлетика, бадминтон, кошарка, баскет 3х3, кану слалом, велосипедизам, ракомет, џудо, пливање, стрелаштво, пинг понг, теквондо, одбојка, планински велосипедизам и гимнастика. За време на фестивалот, Скопје ќе биде домаќин на најголемиот дел од натпреварите, додека Куманово ќе ги пречека велосипедистите и кошаркарите. Уникатниот спортски амбиент ќе биде дополнет со натпреварите во гимнастика, кои ќе се одржат во Осиек, создавајќи вистинска олимписка атмосфера низ различни локации.
