Продукциски многу добро скоцкана, со добра динамика во приказната, убави фаци, со ептен добра музика….али и со многумина кои главното… пораката.. ја осудија за промашена. Компанијата најпрво ја “бранеше“, а потоа ја повлече.
Ете таква е рекламата на Пепси во која “глуми“ популарната Kendall Jenner за која последниве два дена се напишаа многу текстови кои побрза кој од кој да ја искритикува повеќе. Дали е ова голема грешка или компанијата ги тестираше границите на провокација и сето ова е добро смислен план? Со сигурност никогаш нема да знаеме. Фактите се дека споменувањето на Пепси на социјалните мрежи во последниве 48 часа е зголемено за 7,000% (според Brandwatch) а рекламата само на официјалниот канал беше прегледана околу 2 милиони пати. Реобјавена е на стотици канали и вебсајтови. Дали секој публицитет е добар? НЕ, НЕ Е!
Критиките за рекламата генерално се вртат околу тоа дека со неа се тривијализираат протестите и активистите (најгласни се од движењето Black Lives Matter кое се бори за права на афро-американците и анти-трамп протестантите). Замерки има и за улогата на “лепотицата“ од кланот Кардашијан (Kendall Jenner) која е оценета како несоодветна и неприкладна за потезите кои ги прави во рекламата (дискриминација?!), а кои наликуваат на некои историски моменти од претходни протести. Некако и многу весели се протестантиве и полицајциве. Коментар добија и од ќерката на Мартин Лутер Кинг која иронично изјави дека посакувала барем татко и да ја знаел порано моќта на Пепси.
Од Пепси за “мир во светот“ изјавија: „Пепси се обиде да испрати глобална порака за единство, мир и разум. Очигледно е дека ја згрешивме поентата и се извинуваме за тоа. Не ни беше идејата да ги минимизираме проблемите со кои голем број на луѓе се соочуваат ширум светот. Ја повлекуваме рекламата и прекинуваме со емитување на истата“.
Пепси знаеја (сакаа!) да извадат реклама за која светот ќе зборува. Ја пуштија во етер, го држеа buzz-от доволно долго за да има време сите да ја видат, искоментираат и пренесат и потоа официјално ја повлекоа…а дури и и` се извинија на Kendall Jenner за рекламата (пази, таа се согласила на рекламата и добила пари за неа). Ова е нова ера на адвертајзинг, кога брендовите заземаат страна, а рекламите се мешаат со политика!
Ова е реклама која нема да ја заборавите откако ќе ја изгледате, но неа нема да ја заборави ниту адвертјзинг светот бидејќи ќе остави печат на едно време, кој ќе остане силно вмрежан уште многу години. Во секој случај, едно нешто од планот на Пепси е веќе успешено….интернет светот се обедини!….. против оваа реклама подолу:
https://www.youtube.com/watch?v=dA5Yq1DLSmQ
