Македонија ќе биде домаќин на Европскиот младински олимписки фестивал (ЕМОФ) 2025, најголемиот мултиспортски настан за млади спортисти во Европа. Од 20 до 26 јули, Скопје и Кумановои, ќе пречекаат повеќе од 2.500 спортисти од 48 европски држави, кои ќе се натпреваруваат во 15 различни спортски дисциплини. Фестивалот ќе претставува уникатна можност за промоција на спортот, младите таленти и олимписките вредности, а за неговиот успех клучна ќе биде поддршката на волонтерите.
Повеќе од 900 волонтери ќе бидат дел од овој проект, активно вклучени во различни сектори како логистика, акредитации, медиуми, работа со спортисти и официјални делегации, церемонии и спортски арени. Тие ќе имаат уникатна можност да стекнат непроценливо искуство, нови вештини и да бидат во центарот на настан што ќе ги обедини младите преку спортот и олимписките вредности. Волонтерството на ЕМОФ Скопје 2025 не е само поддршка за настанот, туку и шанса за личен развој, запознавање на нови луѓе и создавање спомени кои ќе траат цел живот.
Организацискиот комитет го објави официјалниот повик за волонтери и ги повикува сите заинтересирани, без разлика на нивната возраст и искуство, да се пријават и да станат дел од ова големо спортско семејство. Пријавувањето е веќе отворено, а сите детали за процесот може да се најдат на официјалната веб-страница на фестивалот. ЕМОФ Скопје 2025 не е само спортско натпреварување, туку прослава на младешката енергија, пријателството и заедништвото, а волонтерите ќе бидат тие што ќе ја претворат оваа визија во реалност.
Освен што ќе бидат дел од организирањето на ваков значаен меѓународен настан, волонтерите ќе добијат и официјални сертификати за нивното учество, што ќе им биде вредна препорака за идни ангажмани во областа на спортот, настаните и тимската работа. Нивниот придонес ќе биде препознаен и вреднуван, а искуството стекнато за време на фестивалот ќе им овозможи нови можности во кариерата и понатамошниот личен развој.
Атлетика, пливање, џудо, велосипедизам и гимнастика се само дел од спортовите во кои ќе се натпреваруваат младите олимписки надежи, претставувајќи ги боите на своите држави. Во рамките на фестивалот, посебен акцент ќе биде ставен на екипните спортови како кошарка, одбојка, ракомет и баскет 3×3, кои не само што ја тестираат физичка издржливост, туку и ја нагласуваат важноста на тимскиот дух и соработката. Останати спортови кои ќе бидат дел од богатата програма на фестивалот се бадминтон, кајак слалом, стрелаштво, теквондо и пинг-понг, кои ќе им овозможат на младите спортисти од цела Европа да ги покажат своите вештини и натпреварувачки дух. За време на фестивалот, Скопје ќе биде домаќин на најголемиот дел од натпреварите, додека Куманово ќе ги пречека велосипедистите и кошаркарите. Уникатниот спортски амбиент ќе биде дополнет со уметничката гимнастика, која ќе се одржи во Осиек, создавајќи вистинска олимписка атмосфера низ различни локации.
Повеќе за фестивалот ЕМОФ Скопје 2025 можете да дознаете на следниот линк: https://www.instagram.com/skopje_2025/
Доколку сакате да се приклучите на овој спортски спектакл како волонтер повеќе информации можете да најдете на: https://skopje2025.sporteurope.org/skopje-volunteers/
