Најпопуларната турска летна дестинација – Анталија, покрај прекрасните песочни плажи и активностите на вода, нуди и друга димензија на доживување – планинарски патеки што ги спојуваат природните убавини, археолошките локалитети и руралниот живот во еден автентичен медитерански мозаик.
Помеѓу бреговите на Средоземното Море и планините Таурус, овој регион е дом на три значајни пешачки рути: Ликијската патека, Патеката на Св. Павле и Писидијската патека – секоја од нив со свој ритам, свој пејзаж и свое историско наследство.
Најпознатата и најдолга меѓу овие три атрактивни планинарски рути е Ликијската патека, која е со должина од 540 километри и се протега од крајбрежната област Фетије до Анталија. Оваа рута нуди возбудливи погледи кон бескрајното море, минува низ мали рибарски села, карпести предели, планински премини и тајни заливи. Патеката поминува и покрај значајни археолошки локалитети како Ксантос и Летон, заштитени од УНЕСКО, како и Олимпос, каде природата и историјата се испреплетени. Ликијската патека е омилена не само поради своите пејзажи, туку и поради можностите за авантуризам, како што се параглајдинг од планината Бабадаг, нуркање во Каш – еден од десетте најдобри локалитети за нуркање во светот, и качување на карпи во Гејикбари.
За доживување на овој регион преку призмата на христијанската историја идеална е патеката на Св. Павле. Таа е долга околу 500 километри и ги следи стапките на апостол Павле за време на неговата прва мисионерска мисија низ Мала Азија. Рутата започнува од античкиот град Перге, минува покрај атрактивниот Водопад Куршунлу, преку Кањонот Кoпрулу, селото Селге, до градот Јалвач, кој е дел од мрежата на интернационалното движење „Cittaslow“. Пешаците можат да престојуваат во планински домаќинства, да кампуваат во природа и да ја почувствуваат тивката страна на селскиот живот во Туркије.
На северниот раб на Анталија, низ ридестиот предел на античката Писидија, се протега и Писидијската патека – 350 километри долга рута која поминува низ остатоци од древни градови, стари патишта и пасишта каде сè уште престојуваат јуруците – номадски народ што живее во склад со природата. Планинарите можат да ги откријат урнатините на Сагаласос, каде што се наоѓа импресивната Антонинова фонтана, чии води не се пресушени повеќе од 2.000 години, и Термесос, еден од најдобро зачуваните антички градови во Туркије. Дел од патеката се вкрстува со онаа на Св. Павле, особено околу езерото Егридир, еден од најживописните природни амбиенти во регионот.
И покрај вообичаеното мислење, поттикнато од прекрасните песочни плажи и проѕирното море, Анталија е далеку од само летна дестинација – таа е и возбудлив живописен простор за истражување, поврзување со историјата и враќање кон природниот ритам на живот. За љубителите на тишината, авантурата и автентичноста, пешачките и планинарски рути се патувања што се паметат подолго од каква било разгледница.
