Данскиот пивски бренд Tuborg и најголемиот хард рок и хеви метал музички фестивал во Данска, Copenhell, склучија партнерски договор. По тој повод, Tuborg ја лансираше кампањата „Skål … For Helvede!“ („На здравје… За пеколот!“).
Пивскиот бренд сакаше во рекламата да се појави нивното познато џиновско зелено шише, лоцирано во Копенхаген – градот каде се одржува и фестивалот. Но, оранизаторите на фестивалот имаа еден ултиматум – шишето мора да биде црно!
Решението – Tuborg ангажираше мрачна „вештерка“ која при некаков магичен пагански ритуал приготвува црна смеса која го обраснува шишето и предизвикува од неговиот врв да избувне оган. Метал.
Рекламата е создадена со помош на данскиот режисер Toke Blicher Møller и продукциското студио Holy Ravioli.
Фестивалот Copenhell се одржува еднаш годишно од 2010 наваму, во трање од неколку денови. Оваа година, од 15 до 18 јуни на неколкуте фестивалски сцени ќе се појават бендови како Metallica, Iron Maiden, Judas Priest, KISS, Korn, Mastodon, Mercyful Fate, Opeth и многу други.