На втората вечер од фестивалот Cannes Lions 2023 беа доделени вредните „лавови“ за најкреативните достигнувања пријавени во натпреварувачките категории Entertainment и Craft, со соодветните поткатегории.
Во поткатегоријата Entertainment Lions се пријавиле вкупно 774 кампањи, а биле доделени 28 награди: 5 златни, 12 сребрени и 10 бронзени. Главната Grand Prix награда ја доби кампањата „Clash From The Past“ од агенцијата Wieden+Kennedy Portland за мобилната видео игра Clash of Clans.
Во новата поткатегоријата специјално посветена на гејминг индустријата, Entertainment Lions for Gaming, се пријавиле вкупно 609 кампањи, а жирито додели 26 награди: 3 златни, 6 сребрени и 16 бронзени. И овој пат, Grand Prix наградата ја освои кампањата „Clash from The Past“ на Wieden+Kennedy Portland за Clash of Clans.
Од 437 пристигнати пријави во поткатегоријата за музика, Entertainment Lions for Music, награди добија 18 кампањи кои се закитија со 3 златни, 5 сребрени и 8 бронзени „лавови“. Во оваа поткатегорија беа доделени и две Grand Prix награди и тоа за делото “Beautiful Life” од Michael Kiwanuka и SMUGGLER London, односно за делото “The Greatest” на технолошкиот гигант Apple.
Славејќи ја креативноста во спортот и е-спортот за поврзување на луѓето со брендовите, за наградите во поткатегоријата Entertainment Lions for Sport се пријавиле вкупно 607 креативни дела, од кои 20 се закитија со: 3 златни, 7 сребрени и 9 бронзени „лавови“. Главната Grand Prix награда му припадна на кампањата „Dreamcaster“ од FCB New York за клиентот Michelob ULTRA.
Префрлајќи се на оние натпреварувачки категории кои го слават „занаетчиството“ во креативната индустрија, во поткатегоријата Design Lions се пријавиле 985 креативни проекти, а 34 од нив добиле: 5 златни, 10 сребрени и 18 бронзени награди. Главната Grand Prix награда ја освои кампањата “ADLaM – an Alphabet to Preserve a Culture” од McCann New York за технолошкиот гигант Microsoft.
Во поткатегоријата Film Craft Lions се пријавиле вкупно 1736 кампањи, а жирито додели 55 награди: 8 златни, 17 сребрени и 29 бронзени. Главната Grand Prix награда беше доделена на “We Cry Together – A Short Film” od pgLANG Los Angeles.Се работи за привлечно музичко видео снимено за Кендрик Ламар и Тејлор Пејџ, и тоа во само еден обид.
Од 618 пристигнати пријави во поткатегоријата Digital Craft Lions, жирито реши да додели награди на 20 од нив, и тоа: 3 златни, 7 сребрени и 9 бронзени „лавови“. Главната Grand Prix награда беше доделена на кампањата „Never Done Evolving Feat Serena“ за спортскиот бренд Nike, од агенциите AKQA Sao Paulo, AKQA Portland и AKQA Melbourne.
Во поткатегоријата Industry Craft Lions се пријавиле вкупно 965 награди, а 28 беа наградени со 6 златни, 8 сребрени и 13 бронзени „лавови“. Главната Grand Prix награда отиде во рацете на Dentsu Inc. Tokyo за кампањата “My Japan Railway” по повод 150-годишнината на јапонската железница JR GROUP.
Меѓународниот креативен фестивал Cannes Lions започна во понеделникот, 19 јуни, а ќе трае до петок, 23 јуни. Повеќе информации за фестивалот и добитниците на награди можат да се најдат на официјалниот веб-сајт canneslions.com.