Белгискиот бренд на пиво Stella Artois ласнираше нова кампања за американскиот пазар насловена “Let’s do dinner” („Ајде да вечераме“), канејќи ги фановите да им се придружат на „Најфасцинантната вечера на светот“ што ќе се одржи на 21 септември во Њујорк.
Се работи за наградна игра преку која 15 среќни добитници на главната награда ќе добијат платен престој и покриени патни трошоци за учество на „Најфасцинантната вечера на светот“ во друштво на ѕвезди како актерите Мет Дејмон, Зои Салдања, Џереми Ален Вајт и раперот Лудакрис.
Овие имиња се појавуваат и во централниот спот на кампањата, наздравувајќи со Stella Artois и повикувајќи ги фановите да им се придружат на ексклузивната вечера.
Пријавувањето за наградната игра е бесплатно за сите жители на Соединетите Американски Држави кои имаат навршено 21 година. Покрај главната награда за учество на вечерата во Њујорк, брендот ќе подарува и различен промотивен материјал и вредносни ваучери за нарачка на храна преку Uber Eats.
Кампањата се надоврзува на новата мисија на Stella Artois со која ги поттикнува потрошувачите да уживаат во нивното пиво со вкусна храна и добро друштво. Ексклузивниот настан исто така ја поддржува добротворната организација Water.org, кооснована од Мет Дејмон, а посветена на решавање на глобалната криза со вода.
Кампањата се реализира во соработка со креативната агенција Anomaly, продукциската компанија Arts & Sciences и агенцијата за менаџирање на јавни личности Synergy.