Доколку некој беше загрижен дали Дедо Мраз ќе успее навремено да ги достави сите божиќни подароци во услови на карантин и пандемија, Светската здравствена организација (СЗО) во официјално обраќање до децата од светот соопшти дека добриот дедо е имун на Ковид-19 и дека тој непречено ќе си ја заврши својата работа.
„Јас ја разбирам загриженоста за Дедо Мраз бидејќи тој е повозрасен, но можам да Ве уверам дека е имун на вирусот,“ истакна д-р Марија Ван Керхов од Светската здравствена организација, додавајќи дека во разговор со повеќе светски лидери било договорено на Дедо Мраз да му се обезбеди слободен влез во воздушниот простор на нивните држави.
Меѓутоа, од СЗО повторија дека е многу важно сите деца од светот да разберат дека физичкото дистанцирање од Дедо Мраз, но и од другите деца е многу важно за да се спречи ширењето на вирусот. За крај, беше испратена порака дека е многу важно децата да ги слушаат своите родители и старатели и да си легнат побргу на Бадниковата вечер.
